حَتَّىٰ تُنفِقُوا مِمَّا تُحِبُّونَ
- واحده اعرفها مره عملت اطعام شيكولاته كيتكات، كانت بتوزعها على الولاد المحتاجين، لقيت راجل على قده بيبصلها، فاديتله واحده، فلقيته شالها، رجعتله وقالتله ممكن ترجعها الكشك الفلاني وبدلها باللي يعجبك، قالها لا دي شكلها حلو قوي، انا شيلتها اكلها مع الجماعة والولاد!- واحد اعرفه من بعيد توفى، وانا في عزاه عرفت انه كان بيطلع في شنط رمضان كل انواع المكسرات اللي بيحبها، وكان بيقول عمرهم ما هيشتروها لازم احنا نجيبهالهم
- راجل كبير معرفة والدي رحمهما الله ، كان كل ما يشرب عصير قصب لازم يعزم اي اتنين غلابه من الشارع معاه على قصب
- جت فترة واختفت العسلية تماما من الشوارع، واحده صاحبتي كانت بتحبها قوي، لقيتها واحنا بنشتري حاجات العيد، اشتريت كميات كبيرة ووزعتها على الولاد في صلاة العيد..
- ست كبيرة قاعدة لوحدها، كانت تقولي انا لما يبقى نفسي في حاجه حلوة اكلها، كنت اشتريها واروح عند فلانة وولادها، ناكلها سوى، اصل فلانة دي ظروفها على قدها، اجيب صينية البسبوسه ولا الكنافه واطلع عليهم اكل حتتي وهما بالهنا والشفا ياكلوا الباقي
- مره واحده عملت اطعام وعملت معاه حلو.. والحلو كان تشيز كيك 🌸
- واحده طالبة علم شرعي كان عندها هوّس شرا عبايات، بعد محاولات عدة لعلاج الهوّس ده ، معرفتش، فبقت كل ما تشتري عباية تشتري منها اتنين، واحده ليها وواحده تطلعها لله
- عائله ملتزمه وميسورة الحال، الابن الكبير كان عنده حب تغير العربية بتاعته كل سنه، وممكن مرتين في السنة، ابوه حكم عليه ميغيرش عربيته الا لما يدفع مقدم تاكسي لست ارمله محتاجه، وجابلها التاكسي فعلا واخوها اشتغل عليه وكملوا هما الاقساط..
كل دي نماذج انفاق مما تحبون.. لأنه:
لَن تَنَالُوا الْبِرَّ حَتَّىٰ تُنفِقُوا مِمَّا تُحِبُّونَ ۚ وَمَا تُنفِقُوا مِن شَيْءٍ فَإِنَّ اللَّهَ بِهِ عَلِيمٌ (92)
#جـّرب_مره ، ولو مره واحده في حياتك، ولو لشخص واحد بس.. انك تنفق من اكتر حاجه بتحبها..
عشان تنال البر..
وَإِنَّ الْبِرَّ يَهْدِي إِلَى الْجَنَّةِ . (الحديث)
جرّب.. اي ما يكون حاجتك الللي بتحبها دي (أكل، لبس، شرب، فسحة) جرب تنفقها لله، عشان تنال البر ..وتعالى بعد كده اعملها لنفسك عادي.. عشان في كل مره هتعمل الحاجه دي.. هتلاقي علاقتك بالحاجه اللي بتحبها اختلفت تماما، ..هتفتكر كل مره .. انك في يوم قسمتها مع حد محتاج .. وان الحاجة اللي بتحبها دي.. قربتك خطوة للجنة♥..
جربها..
احساس مختلف،
فعلا وصدقا الصدقة_تطهير..
خُذْ مِنْ أَمْوَالِهِمْ صَدَقَةً تُطَهِّرُهُمْ وَتُزَكِّيهِم بِهَا
متبخلش على روحك بالاجر ده..
جربها ولو مره..
ولو لشخص واحد..
__
وروي عن عمر بن عبد العزيز أنه كان يشتري أعدالا من سكر ويتصدق بها . فقيل له : هلا تصدقت بقيمتها ؟ فقال : لأن السكر أحب إليّ فأردت أن أنفق مما أحب .
__
لَن تَنَالُوا الْبِرَّ حَتَّىٰ تُنفِقُوا مِمَّا تُحِبُّونَ ۚ
وَإِنَّ الْبِرَّ يَهْدِي إِلَى الْجَنَّةِ
وَالْبِرُّ لا يُبْلَى ..
وَالدَّيَّانُ لا يَمُوتُ
تصدق
ليست هناك تعليقات:
إرسال تعليق