لما بنروح نشتري برفان جديد
بعد ما نجرب كام واحد .. بنيجي بعد شوية بنفقد احساسنا بالريحة .. و بنحس ان كله دخل ف بعضه .. ما بنبقاش عارفين نميز الروايح الحلوة من بعض .. ف البياع الشاطر بيفهم و بيحس انك بقيت فلة .. يقوم مطلع علبة فيها حبة قهوة يشممهملك او يفتحلك ازازة اسيتون .. تقوم واخدلك نفس تمام كدة .. و اذ بك ترجعلك حاسة الشم و تبتدي من جديد ... لغاية ما يدخلوا ف بعض تاني و تقوم دافس مناخيرك ف علبة القهوة كمان مرة ... و هلم جرا 😄
الحقيقة اننا فعلا ساعات من كتر ما الحلو بيبقى قدامنا و محاوطنا و متوفر.. بنفقد احساسنا بيه و بقيمته .. فلازم حد ييجي ف حياتك تقابله يقوم بدور #الأسيتون .. تقابل اشخاص بروائح #مختلفة عن اللي اتعودت عليها .. و كل ما كانت الرائحة نفاذة او شديدة و احيانا كريهة كل ما ادركت #الفرق بينها و بين الحاجات الحلوة اللي حواليك و اللي ممكن تكون محاوطاك طول عمرك .. و انت مش حاسس بوجودها !!! 😟..ماتزعلش لما تقابل ناس بالشكل دة !.. او تتحط ف ظروف وحشة .. مرض او تعب .. دة من حسن حظك على فكرة 😊.. علشان لما ربنا يبعتلك الحلو .. تمسك فيه بإيدك و سنانك .. بيحطهم ف طريقك علشان لما يبعتلك هديته تحس بيها .. علشان تعرف قيمة الحاجة الحلوة اللي معاك و تحافظ عليها ما تفرطش فيها .. و ماتفتكرش ان دة العادي .. فتهمله و تتخيل ان فيه منه كتير .. و لو راح هيتعوض 😏 !!.. تتغر و تفتكر ان الدنيا كلها #محل_عطور .. و تفوق على اكبر قلم .. حقيقة انها اسوء من سلة_المهملات .. و فيها من درجات العفونة درجاااااات .. و اشكال و الوان و على كل لون يا باطيستا !!!ساعات مابنشوفش الأبيض او نحس بنصعانه الا لما يتحط جنب كريمي او اوفوايت .. و ما بنحسش بالسواد الا لما يتحط جنب الكحلي او الرمادي ... قالولنا زمان ان التضاد يقوي المعنى و يوضحه .. و الفروقات البسيطة ما تدركهاش العين و لا القلب الا لما تتقارن بحاجة تانية اسوء او احسن 👍👎..المهم بأة انك لما تدركها و تعرفها .. تقدرها بجد و تحافظ عليها ... تعرف ان وجودها ف حياتك نعمة 💖.. تشكر ربنا عليها و تشيلها ف عيونك ... علشان تفضل مستمتع بشذى عطرك اطول فترة ممكنة ..😊
ليست هناك تعليقات:
إرسال تعليق