عارفين الشخص اللي عمره ما بيتدخل في حياه غيره او ينصح لأن عنده تقبل لأي آراء او تصرفات او افكار
عمره ما بيسأل حد عملت ايه او بتقبض كام او شغال فين و حتي مبيهتمش انه يعرف ده
دايما الناس بتحكيله و تأتمنه علي اسرارها و تتكلم معاه بمنتهي الراحه لانه عمره محكم عليهم ابدا ولا تطفل علي حياتهم دائما بيسمع من الناس اللي حابين يقولوه بس
بيتقبل جدا ان الناس مختلفه و ده بيكون ناتج اختلاف تربيه و ثقافه و شخصيه وحاجات كتير و بيحس انه مفيش داعي انه يخلي دي منطقه خلاف بيفضل يخليها منطقه تقبل
ده بيدي اللي قدامه انطباع انه سهل و لين لدرجه انه ممكن يلين في حقوقه و ان مسموح لاي حد يخترق حدوده و يتدخل في حياته وقراراته
بيفتكروا ان التقبل اللي عنده ده ضعف شخصيه او انه ملوش رأي بما انه قابل كل حاجه كده فممكن نخليه يقبل بحاجات علي مزاجنا برضه
الشخص ده مش بوشين ولا بيقبل حاجات ضد قيمه انما هو محترم ان دي قيمك انت !
الشخص ده لو في حياتك اوعي تفكر تعمل معاه كده لانك هتتفاجئ
هتتفاجئ ان الشخص الهادي الوديع ده بيتحول و بيقلب عليك بس كل ده في صمت تام والقلبه دي بتكون في صوره قرارات انك خلاص من دلوقتي مش في دايرته المقربه
انك هتفضل تتكلم بس هو مش سامعك
انك خلاص مبقتش تصلح تكون في علاقه معاه بس حتي لو كمل معاك
الشخص ده اكتر حد حريص علي حدوده و بيحترمها و بيقدسها كمان ومن كتر احترامه ليها مبيسمحش لنفسه ابدا يخترق حدود غيره ولو بمجرد النصيحه العابره
صعب اوي ينصح حتي لو حد طلب رايه لأنه مش متخيل انه ممكن يكون بيتدخل في حياه حد وان ده يمكن يحسسه بالضيق
بيقول انا رايي كذا
او انا لو مكانك هعمل كذا
ومش شرط ان اللي ينفع معايا ينفع معاك ففكر وشوف الانسب ليك
النوع ده من الناس فعلا بيثور من جواه لما حد يقتحمه و ينصحه بصيغه الامر مهما كان حسن النيه واضح في الكلام بس فعلا بيكره الاسلوب ده و الكلام من عينه
اعمل كذا
خلي بالك من كذا
اهتم بكذا
انت مش ملاحظ انك مقصر في كذا
وبتكون اصلا النصايح دي حتي مش هتعود علي الناصح بأي منفعه الموضوع بيكون تدخل صريح في حياته بدون وجه حق
بس للاسف بتكون النتيجه أنه بيسمع للاخر و بيقول حاضر هعمل كده باذن الله 😊 وعلي وشه ابتسامه و جوه قلبه نار انه مش قادر يعترض
الشخص ده بيبقي اسهل عليه يعمل كده من انه يدخل في جدال او يناقش اللي بيتدخل في حياته في الكلام لانه اغلب الظن بيهز راسه وهو مش سامع
وبيبقي اسهل عليه رد الفعل ده من انه يعترض بشياكه علي الاسلوب ده وانه مبيحبوش و مبيحبش حد يتدخل في حياته
ثقافه النصيحه بالنسباله انه لما يطلب رايك و يجيلك لحد عندك مخصوص يطلبها تديهاله و العكس صحيح عمره ما بيتطوع ويدي نصيحه ابدا
ياريت لو في حياتكوا شخص من النوع ده تراعوا مشاعره و تحترموا حدوده لان التعبير عن القلق و الغضب من الاسلوب ده للاخرين صعب جدا عليهم وفعلا بيفضلوا الصمت
ويا ريت لو انتو بتعملوا كده تعرفوا ان النصيحه غاليه فلازم تتطلب الاول و ان اللي بينصح عمال علي بطال و يعدل علي حياه غيره هو في الحقيقه عمال يبص علي الفراغات اللي جواه و يروح يسدها عند اللي قدامه بنصايحه !
ليست هناك تعليقات:
إرسال تعليق